Search
Search

Lē toe manaomia se fai fagogo ae saili fofo i le gasegase o fatuga’o…Laauli

Na tuusa’o le tuualalo a le Minisita o Faatoaga ma Faigafaiva le susuga Laauli Leuatea Polataivao Fosi Schmidt, i totonu o le maota fono o Samoa, ia galulue faatasi sui uma o le Palemene e fai se galuega laveai i le tulaga faatupulaia o tagata i le atunuu ua aafia fatuga’o ma ua faamama o latou toto.

Ua fautuaina ai e le minisita sui faipule e lē o toe manaomia i le taimi lenei ni faiga fagogo i saunoaga i le lipoti a le soifua maloloina ae galulue faatasi e saili ni fesoasoani ma ni auala e togafiti ai gasegase lē pipisi e faasino i le suka ma le toto maualuga ua mafua ai ona faaletonu fatuga’o.

Ua toe manatua ai i le saunoaga a le taitai o le Itu Agai ma le faipule o Faleata 3, le tofa Mulitalo Siafausa sa avea ma Minisita o le soifua maloloina i saunoaga a nisi o faipule o le Palemene, a o talanoaina le lipoti a le komiti faapalemene sa lauliliuina le tautua a le auaunaga faalesoifua maloloina e faasino i le falemai faamamā toto.

O le falemai faamamā toto i Motootua ma Tuasivi o nofoaga ua molimauina le toatele o tagata i lo tatou atunuu ua faamamā ai o latou toto ona o aafiaga o fatuga’o mai gasegase o le toto maualuga ma le suka

Ina ua saunoa le taitai o le Itu Agai, sa ia toe faailoa i le Palemene taimi o Mulitalo ma le luitau na ave iai e le Kapeneta i lea vaitaimi e saili ai se fesoasoani e faatu ai se falemai faamamā toto.

O faigata na feagai ma lea tamalii na taunuu lelei ina ua talia le talosaga a Samoa e le faalapotopotoga o le gasegase o fatuga’o a le atunuu o Sigapoa ma fesoasoani ai i le faatuina o le falemai faamamā toto i Samoa.

Na saunoa ai foi le faipule o Faleata 3 ma ia fautuaina e faaigoa loa lea auaunaga i le tofa Mulitalo Siafausa.

Ua fautuaina foi e le faipule o Faleata 3 le toe faatuina o le komiti faapalemene sa iai i tausaga ua mavae sa latou asiasia tulaga o iai le soifua maloloina o fanau i totonu o a’oga i le atunuu.

O le komiti lea sa taitaifono ai le susuga Laauli Leuatea a o avea ma Fofoga Fetalai.

O le fautuaga a le tofa Lealailepule Rimoni Aiafi, ia toe filifilia le minisita o faatoaga ma faigafaiva e avea ma taitaifono pe a toe faatuina lea komiti tāua a le Palemene.

O se komiti sa latou asiasia nisi o faleaoga ma faia ai le faaiuga e tapuni nisi a’oga ona o le faaletonu o faleui faapea falea’oga ua lē toe saogalemu mo le faaaogāina e fanau.

O le aotelega o finagalo o sui faipule na saunoa i le lipoti, le tāua o se galuega ua tatau i le malo ona faatino ina ia unaia ai faalauiloa ia malamalama tagata i aafiaga o le soifua maloloina mai meaai ua taumamafa ai nei.

Na faailoa e le faipule o Aleipata Itupa i Luga ua tatau ona taofia le taumafa o le pa’u mamoe e pei ona sa taofia foi le toe faaulufale i le atunuu o siusiu pipi poo turkey tails. 

I le saunoaga tali a le Minisita o le Soifua Maloloina le afioga Valasi Luapitofanua Toogamaga Tafito Selesele, na ia ioe ai i atugaluga uma sa laga i saunoaga a sui faipule.

Na ia faaalia o se valaau leotele i le Malo mo se fofo o gasegase ua mafua ai ona faaletonu fatuga’o aemaise o isi totoga o le tagata soifua.

Ua faailoa foi e Valasi o faamaumauga o loo iai nei i le mae’a o sailiiliga ua faailoa ai o le 30 pasene o le faitau aofai o le atunuu ua aafia i le gasegase o le suka ae o se numera tele o tagata mai lea aofaiga o pasene, ua faaletonu fatuga’o ma ua faamamā o latou toto.

Ua taatia atu nei i le Minisita ma le Matagaluega o le soifua maloloina fautuaga a sui faipule na sausaunoa aemaise o fautuaga a le komiti faapalemene i le latou lipoti mo se gaioiga e tatau ona faatino.

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required