E to’atele i Melepone e lē o fiafia i le faai’uga ua lē faataunuuina ai se tasi o faamoemoe tele e masani ai i tausaga ta’itasi i le vaitau lenei o le Kerisimasi, o le faaaliga o moli o le Kerisimasi e faia i le itu i Saute o Melepone ma e sa’ilia ai seleni mo le National Breast Cancer Foundation.

O le faaaliga o mōlī e faaigoa o le The Grange Road Lights Show i Sandringham e tumutumu iai tagata mo maimoaga i tausaga ta’itasi ma tuuina ai ni a latou foa’i mo le National Breast Cancer Foundation peitai i le tausaga nei ua faailoa e i latou e faafoeina le faaaliga, o le a lē oo ona o le tele o le mau tupe alu i le faataunuuina o le faaaliga aemaise le mau mea e mana’omia ona faatino e pei ona poloa’iina e le pulega faalotoifale, le Local Council.

O le faamatalaga e faapea ua tele le mau pepa e faatumu ma pemita e mana’omia ona maua faato’ā mafai lea ona faatino le faaaliga ma i tausaga e lua ua tuana’i e silia ma le 10 afe na totogi e faamalie ai le tele o mana’oga o le Council i mea e ao ona faia.

I se tali ane a le Council i le faamatalaga mai ia i latou e tuufaatasia lea faaaliga, ua ta’ua ai o loo faanoanoa foi i le lē oo o lea faaaliga i le tausaga nei ae sa galulue faatasi lava ma organisers ia taunuu le faamoemoe peitai ua lē ogatasi lava fuafuaga ae sa tuuina lava iai le lagolago i mea uma sa mana’omia ane.Ua faailoa le lē fiafia o le to’atele i le faai’uga ua faia ma le lē mafai ona soalaupule o le mataupu i se tulaga faamalieina mo le to’atele e masani ona aga’i atu i lea faaaliga.

Puna o Faamatalaga: https://www.abc.net.au/news/2024-11-25/grange-road-christmas-lights-cancelled-bayside-council/104642328