E oo atu i le 200 le ‘au pasese poo tagata femalagaa’i na i luga o se va’alaupasese a le Bluebridge Connemara na lē mafai ona agai i uta mai le va’a, ina ua māua se faaletonu i le va’a.
Ta’ua i ripoti, o se faalētonu i le ramp, poo le auala e ui ma agai ai le ‘au pasese ma taavale na mafua ai ona lē mafai ona o ese tagata mai le va’a laupasese.
Faamatala o le va’a ua agai ese mai le uafua ae ina ua logotala le ‘auva’a i lea faafitauli o lea na toe liliu ai le va’a ma toe agai i Ueligitone, ma tōloa ai le fa’aauauina o le faigamalaga mo Picton i le afiafi o le Aso Gafua o lenei vaiaso.
Talu ai ona o lea faalētonu,o lea na iai pea le pasese i luga o le vaa i le po atoa, a o taumafai le ‘auvaa ma tagata faigaluega e fo’ia le faafitauli.
Faamauina faato’a mafai ona fō’ia lea faalētonu i le malamala a’e o le taeao i le itula e 10.
Na māua le tuuina mai o se faato’esega a le Bluebridge, e tusa ma se lape o le auaunaga, ma fa’aalia ai o le a toe faafo’i seleni poo tupe na totogi e tagata mo pasese, ma toe faatulaga taimi ma aso o faigamalaga a i latou nei.
E lē o se taimi muamua lea ua tupu ai se faalētonu faapea, e pei foi ona iai le mataupu na aqlia’e mai i le masina o Setema o le tausaga 2024 na pē faafuase’i ai le va’a, lea na moomia le fesoasoani mai nisi o tama’iva’a poo le vaega ua ta’ua o le tug assistance.
Puna o Faamatalaga:https://www.rnz.co.nz/news/national/583588/200-passengers-stranded-on-bluebridge-ferry-overnight
