Na ta’ua e le vaega faaupufai a le Labour, e lē o amana’ia le Minisita o Fale o le malo, e lo latou ta’ita’i ma ona uso a minisita, ina ua sau ai le faasilasilaga o le a faaitiitia le tele o fale e fausia i Aukilani mai le 2 miliona sa faatulaga ai ae ua faaitiitia pe tusa ma le 1.6 miliona fale.
Saunoa foi le ta’ita’i o le ACT, David Seymour, e mana’o e fia vaai i le nofoaga o le a fausia ai nei fale a o le’i tuu atu lana lagolagosua.
O ananafi na faia ai e le Minisita o Fale o le malo, Chris Bishop lea faasilasilaga i le suiga ua fai, i ta’ita’i o Aukilani.
Saunoa le sui ta’ita’i o le Labour, o ia foi o le sooupu a le vaega faaupufai mo Aukilani, le tama’ita’i faipule o Carmel Sepuloni, o se tulaga masiasi mo Bishop le toe faia o lenei suiga, ma e foliga mai e lē o soliga lelei fesoota’iga i le va o minisita a le faigāmalo.
Saunoa Sepuloni, e iai isi faipule o loo taula’i ia faamalie vaega e patino ia i latou lava ma o latou itumalo, e pei o le faipule o Epsom, David Seymour ma le faipule o Howick, Simeon Brown, ma tuuaulafo i manatu o tagata o latou itumalo lea e uuna’i ai toe fetuuna’iga nei.
Fai mai Sepuloni, o se tulaga masiasi mo Bishop, ua fia masina o galue malosi e taumafai ina ia faatulaga le fausia o nei fale, ae uma ane ua toe talepe atoa e Christopher Luxon lona tautigā.
Na te iloa le naunau o Bishop e faia nei fuafuaga mo Aukilani ma e na te iloa le tāua o le lava o fale e fausia, ma o lenei suiga o se matuā aafiaga tele mo aiga o Aukilani o loo sa’ili ni fale e latou te gafatia tau.
E faapena foi le lē fiafia o le vaega faaupufai a le Greens i lenei matāupu, e pei ona saunoa lo latou sui ta’ita’i, Chloe Swarbrick, e matagā lenei mea ua tula’i mai.
Fai mai Swarbrick, o le mea e ofo ai, e ‘apo e le malo i latou ua mautū o latou fanua ma fale faatau, ae faatuatuana’i uma isi tagata i le taimi o lea e faaigoa e le Komisi o Galuega Tetele, ua matuā manino le agavaa mo le atina’e o Niu Sila.
E lē o ‘alofia e le Labour poo le Greens lo latou folafolaina o le toe faia o nisi suiga i lenei matāupu pe a faia faalauiloa mo le faigāpalota o loma nei.
Puna o Faamatalaga: https://www.rnz.co.nz/news/political/587326/opposition-parties-react-to-auckland-housing-u-turn?cid=newsletter
