Ua faaleo e nisi o tagata Filipino e galulue kamuta e faitau afe tupe o o latou totogi e lei totogiina atu a o galulue ai i le poloketi o le City Rail Link a Aukilani.

O le First Union, le Iuni lea o loo tulai mo i latou ia e toavalu mai se kulupu o tagata faigaluega e toa 70 o loo aofia i le mataupu lea, ua faailoa o le kamupani sa faigaluega ai i latou ia, le Rehua Reo Contracting sa o latou faamalosia le faamaamulu o tagata faigaluega mai le galuega e ala i le taofia o o latou totogi mai lava i le faaiuga o le tausaga na tea nei. 

Fai mai o nisi o i latou ia sa manuia talu ai nei i le Resident Visa Scheme 2021.

O le latou mau pe tolu vaiaso o totogi ma le holiday pay e lei maua atu, o le toatele o i latou pe ā ma le $6,000 le aofai o totogi e lei maua, o isi e silia ma le tai $8,000.
Ua faamaonia e le faamasinoga maualuga na faaleaogaina e le IRD le kamupani lea ia Novema 2021 ma o loo tālia pea se iuga o le mataupu lea i le faamasinoga.

Fai mai sui o le Iuni e lei iai ma se faamatalaga a le kamupani lea i tagata faigaluega e ta’ua ai le toe faatulagaina pe faaleaogaina foi o le kamupani, na faatoa faateia tagata faigaluega ina ua a’e atu i galuega ia Ianuari ae faailoa ane e leai ni totogi mo le toeititi masina atoa ma amata mai loa lenei mataupu.

O le toatele o le aufaigaluega lea o loo ua saili galuega i nisi kamupani ae o le mea mautinoa o i latou uma ia o loo feagai ma le mau aitalafu ma pili e totogi e fai o le totogiina o talosaga o visa e faatumau ai i le atunuu ae o le tausiga foi o nai o latou aiga.