Ua faaalia le lē fiafia o tagata Aukilani o loo nonofo i le itu i Sisifo i le leai o se faaiuga tatau o faia i o latou fale lea foi ua toe lolovaia.
O le toe pa’ū ai o timuga mamafa ananafi i Aukilani, o le itu lava i Sisifo lea foi na muamua sau ai lipoti ua toe lolovaia ma o lea foi na muamua toe sau le valaau i mātua e agai atu e aveese mai fanau ona ua le saogalemu.
I molimau a nisi i tala a le Newshub o le faalima ai lea ona lolovaia o latou fale i totonu o le umi e i luga laititi atu lava ma le tausaga.
O le toatele o i latou i Sisifo o Aukilani na toe molimau i le lē fiafia i le Auckland Council ona o le leai o se faaiuga tatau na faia i o latou fale mai isi lologa na tutupu muamua, e ese ai ananafi.
E le gata o le leai o se faaiuga a o nisi e le o fiafia i le lē lelei o fesootaiga ma le council e faatatau i o latou fale.
E sau le faasilasilaga o le Poloaiga o faalavelave faafuasei mo Aukilani ananafi o loo i Ausetalia le pulenuu ia Wayne Brown i luga o galuega ma o lona sui ia Desley Simpson lea na faailoa mai o loo vaaia le galuega a o toesea.
A o faatali pea la se isi tala a le Auckland Council mo aiga nei ua toe aafia foi, o lea na feiloai atu le minisita ia Michael Wood i nisi o aiga aafia i le itu i Sisifo ananafi, ma ua fai mai le sui faipule o Mt Roskill o totonu o le tolu vaiaso e tatau ona manino mai ai se faaiuga e faatatau i fale o aiga ua toe faaleagaina foi e le vai.
