Ua lē lava le onosai ma ua faaleo ai le lē fiafia o mātua i le tele o aso tia’i aoga o fanau e mafua mai lava i solo tetee a faiaoga ma feutanaiga ma le malo.
O le vaiaso nei lea ua toe faaauau ai ona aooga mai le fale vasega taitasi o kolisi maualuluga i le mae’a toe teena ai e le Post Primary Teachers Association o le ofo lata mai na tuuina mai i le Aso Faraile talu ai.
O le asō o le Vasega 10 ma le 11 lea e le o o i aoga ae o le aso a taeao o le Vasega 12 ma le 13.
O le āluga lava lenei e faaauau ai seia oo i le Aso Tofi, 29 o Iuni poo le vaiaso mulimuli o le kuata lenei.
O le aotelega e 5 lelei aso aoga misi mo le tamaititi aoga toatasi i totonu o le tolu vaiaso ua amata nei, ma ua ta’ua e mātua e le faigofie o lea foi faatoa uma atu le Koviti na aafia ai aoga a fanau.
O feutanaiga nei a faiaoga ma le malo e faatatau i totogi faapea nisi itu o auaunaga faafaiaoga na amata mai o loo tele ina lagolago e mātua, peitai ua oo i se tulaga ua mou mālie atu ai le lagolago a mātua ona o fanau lea foi o loo tigaina ai.
E iai le petition ua amata e nisi o mātua ma e oo mai i le taeao nei ua silia ma le 700 mātua ua sainia ma le talosaga ua tatau nei ona faamuta le faiga o loo leai ai ni aoga a fanau o loo i kolisi maualuluga.
