Lipotia mai le mata’utia o se faalavelave na alia’e mai i Rotorua i le afiafi o le Aso Tofi, na lavevea ai se pasi la’upasese ma se taavale laitiiti.
E to’atasi le tagata ua maliu mai lea faalavelave ma le to’a tolusefulutasi i latou na manunu’a, ma e faaalia e aofia ma ni fanau a’oga.
Faamauina i lipoti o le kuata e te’a ai le 9 i le afiafi na tupu ai lea faalavelave i le auala o Te Ngae Road i Owhata.
Na faanatinati atu iai le to’atele o sui o auaunaga o faalavelave faafuase’i, e aofia ai le 10 o taavale a le falema’i e tali atu i lea faalavelave.
Faamaonia e leoleo, o le pasese a le taavale laitiiti na aafia lea ua fano le soifua ae o le avetaavale ma se isi pasese na manunu’a ma o loo i se tulaga tigāina.
Faamatala e le tasi o tagata e aumau i le faaitu na tupu ai le lavea, i le faate’ia ai o ia i lenei faalavelave, ma ia faaalia le vaai alofa atu i le aumanunu’a a o le momomo o lona loto i se tama’ita’i ua aioi ma valaau atu i le moomia o le fesoasoani, ae ua na o le moomoo e fesoasoani atu ae e le’i mafai.
Faaalia na mamau lea mafine i lalo o le taavale.
O loo faasolo su’esu’ega a leoleo i le māfua’aga o lenei faalavelave mata’utia.
Puna o Faamatalaga: https://www.nzherald.co.nz/nz/rotorua-crash-leaves-31-injured-two-in-critical-condition/O6SZV32CF5FQ3DEPRBOTET5D4U/
