E mae’a galuega fesoasoani a le Koluse Mumu i le Aso Faraile ua mavae nei ua lata i le 200 aiga sa aafia i lologa ua oo atu iai le tufatufaga o fesoasoani a le Koluse Mumu i afioaga e 14 sa aafia i lologa na se’i mavae atu nei e pei ona faailoa mai ai e le Faauluuluga o le Ofisa o le Koluse Mumu i Samoa.
Na faaalia e Namulauulu Tautala Mauala, e tusa ai o le galuega sa faatinoina i afioaga sa aafia, “Sa fai la matou suesuega o aiga ia na aafia e base mai ai ituaiga o fesoasoani mafai ona tuuina atu ma o suesuega foi ia matou te iloa ai le tulaga ogaoga o le aafia ai o maota o aiga nei mai lologa.”
“Ia ave tatau foi fesoasoani i ē o loo manaomia lava ma ua tulaga pagatia.
“O fesoasoani muamua na ave iai o tapoleni sa maitauina foi le moomia o le suavai ona sa faaleagaina paipa, o lea na matou tapenaina ni faguvai e le gata i faguvai sa faatau mai i faleoloa ae o faguvai foi ia e faaaoga e faamamā ai, o le suavai mo taumafa faapea ai tainamu ia ma hygenic kits, shelter ma tool kits.
“O nisi nei o mea faigaluega sa tuuina atu mo nai tagata ua leai ni maota ma laoa e amata faufau ai o latou fale e tau ina malu iai ma le anoanoai lava o fesoasoani lea e masani ona faamatuu atu e le Koluse Mumu.
“E pei ona silafia o le tele o vaivaito’a talu mai lologa ua faatuputeleina ai le namu, o lea sa ave ai tainamu ina ia puipuia mai i faama’i o namu.”
Na ta’ua e Namulauulu e oo mai i le asō o loo faatino pea le galuega a le Koluse Mumu i le motu tele i Salafai i nisi o aiga o loo manaomia le fesoasoani i le tulaga sa faaletonu ai mai lologa.
“O mea lava sa mafai ona matou teuina e pei ona silafia o loo iai a matou containers ma fale teuoloa o loo i totonu o le tele o afioaga ia o Savaii o loo i Tuasivi, o inā sa mafai ona faamatuu atu ai le tele o fuafuaga o oloa e toe tau amatamata ai aiga o i latou sa aafia.
“E iai lava aiga e pei ua faaseā faapea ua tufa meaalofa, e le o ni meaalofa ua na o se fesoasoani e tau ina toe amata ai le aiga.
“Ia ae pei o le agaga lava ia teumalu nei fesoasoani auā lava le avagalimaina o manaoga o tatou tagata i taimi o faalavelave faapenei.”
E iai nisi o aiga sa maitauina e le Ofisa le tulaga i tapenaga a aiga i taimi e aafia ai i faalavelave faafuasei.
“O i foi e iloa ai tulaga i tapenaga a aiga lava ia i taimi o faalavelave, auā o le tele o aiga e oo atu suesuega ua uma ona toe tapena faaletonu ma mautinoa ai o loo iai lava le malosiaga e tapena ai latou e le tau faatalitali poo le ā le mea e mafai ona maua atu.
“E momoli ai foi le faafetai i nai aiga ia ua lē faalogologotiga ae ua tulai lava latou e toe amata o latou aiga.”
