E tasi le miliona tala Niu Sila poo le lata i le 2 miliona tala Samoa, le tau o masini fā’ata poo xrays ma masini e mafai ona latou iloa ni auupega ma mea faapapa malolosi i uta feaveai, ua fesoasoani mai ai le Malo o Niu Sila mo le siitia o le puipuiga o le tatou malaevaalele faavaomalo i Faleolo.
Ua faailoa lautele lea fesoasoani ma le faafetai a le Minisita o Galuega tetele ma felauaiga e aofia ai le pulega o malaevaalele le tofa Olo Afoa Fiti Vaai, i le sui o le Malo o Niu Sila i Samoa ona o le faaauau pea o le alofa tulai o lea Malo i galuega tau i le puipuiga o o tatou malaevaalele.
E pei ona silafia o le malaevaalele i Fagalii ua iai foi se masini fā’ata faaonapo nei ua siaki ai ato ma uta feaveai i le va o Samoa e lua.
I le foai o masini fā’ata e fā mo Faleolo, o le tasi o fā’ata e sue ai atotaitai i le vaega e nonofo ai pasese, ma le isi masini e mo le siakiina o ato e ave i le vaega e tuu ai uta.
Ua iai foi le masini e ta’ua o le metal detector e siaki ai pasese i le taimi e agai ai i le vaalele.
Ua faaopoopo i le fesoasoani o ia masini le aumaia e Niu Sila o tagata popoto e faapipii masini ma faia foi aoga mo tagata faigaluega i le faaaogāina.
O le taligamalo a Samoa i le fono a Malo o le Taupulega i le tausaga fou, o se tasi lea o mafuaaga tāua o le foai a Niu Sila auā o lea fono faavaomalo o le a tumutumu mai ai le toatele o tagata o usugafono mai fafo.
O se tasi o fesoasoani e fesootai lava i le leoleoina o o tatou tuaoi i malaevaalele ma uafu, o se taifau sosogi ua faatupe foi e Niu Sila ua faaaogā i le sosogiina o uta ma ato e taunuu mai, ona o le isi lea o auala solitulafono e faaulufale mai ai i Samoa pauta ma fualaau faasāina.
