O le faamaninoga lea a le Alii Minisita o le Matagaluega o Fuagafanua ma Elelele o Samoa le Afioga Toeolesulusulu Cedric Schuster, i le polokalame o le Tanoa Ava ma Leiataua Savea Peseta Al Harrington Lavea.
Sa faaalia e Toeolesulusulu o le taimi nei o loo vaavaai le matagaluega i se Faiga pe toe totogi pe o le a tuuina atu loa fanua nei i nisi tagata latou te lisiina.
Sa ia faailoa foi e silia i le tasi le afe tagata o loo i le lisi faatalitali i le taimi nei e fia maua ni fanua i lo tatou atunuu.
O le Matagaluega ua vaaia nei e le Alii Minisita ua tuuina uma iai i lalo fanua o le malo lea sa vaaia e nisi o Matagaluega ma Faalapotopotoga e pei o le Samoa Land Corporation, o le STEC ma fanua i lalo o le Matagaluega o le MNRE le Land Board.
Na ta’ua e Toeolesulusulu o se faiga ua talafeagai ai le tofa i le Tamaitai Palemia ona o le tulaga sa iai e eseese uma faiga faavae sa faatino ai galuega mo fanua a le malo.
E pei ona ia aumai faafaataitaiga ai le lisi mai o se fanua tasi eka mai le MNRE e tusa lona tau ma le 100 i le tausaga, a lisi mai se tasi eka mai le SLC e $300 i le masina, a lisi mai le tasi eka o se fanua mai le Esetete Tausi e $400 i le masina.
O le isi tulaga o aiga o loo umia le fia selau eka o fanua o le malo e lē o faaaogāina, o nisi o nei aiga o loo ua aumau i fafo ae o loo totogi mai pea le lisi, o nisi foi ua lē o toe totogia se mea peitai o loo iai lava i lalo o latou igoa i lisi.
O nisi foi o fanau a fanau a ē na latou lisiina fanua ua faamasino ai ma nisi ona fai mai latou o esetete a o latou mātua peitai o fanua ia o le Malo o Samoa.
Saunoa Toeolesulusulu o loo galulue le Matagaluega i le vaavaaia i le taimi nei o le mataupu tau Land Policy poo faiga faavae o fanua a le malo, faatasi ai ma le taumafaiga i le Land Reconciliation e toe tilotilo ai tulaga o le faamatuu atu o fanua ma lona faaaogāina.
O le tasi o anavatau a le Vaega Faaupufai o le FAST ua avea nei ma malo ia toe faafoi atu fanua o loo vaaia e le malo i nuu ma afioaga auā le galuegaina.
Na ta’ua e Toeolesulusulu o le tasi lea o tulaga o loo vaavaai iai i lalo o le Land Reconciliation ona e iai nisi o fanua na toe faafoi atu e ala i le faatau peitai e lē o mafai ona lesitala.
O nisi o fanua o lea ua toe faafoi ae o loo lisi lava i afioaga, ae o nisi o afioaga e lē o maua ni fanua ae ua leva ona talosaga.
E iai afioaga sa talosaga i le SLC, o isi o le STEC o isi o le MNRE o le tulaga o loo vaaia ai, e eseese uma tau o lisi na faamatuu atu ai o le ala lea o le taumafai nei o le Matagaluega fou lenei ina ia faapaleni ma ia laugatasia ai tagata uma.
