Ua lapata’ia tagata Ausetalia o le a mamafa faasalaga mo i latou e faatinoina faasolitulafono mea faapāpā poo fireworks i le aga’i atu i le faamanatuina o le tausaga fou.

Ua lapata’i mai le Safework NSW o le a faia a latou siaki i le taimi e faatino ai mea faapāpā ua mae’a faatulaga ma e matua’i lē taliaina nisi e solia aiaiga ua faatulagana.

I setete uma o Ausetalia ma ona teritori ua faatulaga ai mea e faatonutonu ai le faaaogāina o mea faapāpā ma e matua’i mana’omia le faia ai o pemita.

O lona uiga la e pei ona lipotia, o soo se mea faapāpā e faia faasolitulafono o le a tuuina iai se faasalaga tele, i le Northern Territory lava ia e ono oo le faasalaga i le $1,850.

Fai mai e mamafa atu faasalaga mo NSW ma o i latou e maua o faatau, pe teuina, feavea’ia ma faatino mea faapāpā faasolitulafono e ono faasala i se faasalaga tupe e ono oo atu i le $27,500 poo le falepuipui mo le 12 masina.

O le faaeteetega o le faaaogā o mea faapāpā ona e ono afua ai ni afi e mu ai togavao, aafia ai fale ma komiuniti aemaise soifua o tagata.

O Kuiniselani e oo atu i le silia ma le $52,000 faasalaga ma le 6 masina i le falepuipui.

E oo i tagata e iai laisene e faaaogā ai mea faapāpā e ao foi ona tausisia aiaiga pe a fai ni a latou faaaliga.

Puna o Faamatalaga: https://www.9news.com.au/national/new-years-eve-fireworks-warning-over-illegal-use/1a1994d4-97c6-4ce2-8d12-3920dad2405d