“Lagolago le Palemia o Samoa i le tāua o le pitolaau a le Fono Faufautua i Aukilani”…Ta’ita’ifono filifilia

I le 51 lenei o tausaga talu ona faatūina le Fono Faufautua a tagata Samoa i Aukilani Niu Sila, ua faailoa e le ta’ita’ifono filifilia o le laulau fou a le fono faufautua, le susuga Leiataualetauā Savea Al Harrington Lavea, le lagolagoina e le Palemia o le malo o Samoa le susuga Laaulialemalietoa Leuatea Polataivao Fosi Schmidt o le tāua o le galuega a le Fono Faufautua.

O lea lagolago a le ta’ita’i o le tatou malo e pei ona faailoa e le ta’ita’ifono filifilia sa faailoa a o iai i Aukilani i lana siiga gasegase.

O le masina fou o Tesema o le a faapaia ai tofiga o le laulau fou i se faatasiga i le Maota o Samoa o loo iai le ofisa o le Konesula o le tatou malo.

O sui ua filifilia nei i le laulau mo le isi 3 tausaga:

1. Ta’ita’ifono: Leiataualetauā Savea Seiuli Peseta Al Harrington Tumanuvao Lavea.
2. Sui Ta’ita’ifono: Asiata Falemalu Pio Vaoliko.
3. Failautusi: Rev. Toleafoa Larry Tupa’i Lavea.
4. Teutupe: Loli Mesepa Channing & Tusani Tafa’ilagi Sua.
5. Fautua Faapitoa i le Komiti Faafoe: Su’a Tolumaanave Misiluki Su’a Faumuinā.
6. Ta’ita’i o Soā Komiti: Mano’o Lo’ufono To’o Lavea & Tofilau Ted Stanley.
7. Loia a le Fono Faufautua a Samoa: Asiata Atina’e Vaai.

Faamaumauga o le Tala’aga:  

O le Fono Faufautua a Samoa i Niu Sila, sa faatū ma faavaeina i le tausaga 1984 ina ua a’e le tofa i Tamā Matutua aemaise Tupu ma E’e ma Faleupolu o Samoa sa iai i lena vaitau ina ia iai se mafutaga a Samoa e Faamaopoopo ai le atunuu i Niu Sila aemaise le aai tele o Aukilani ina ua vaaia le to’atele o le mamalu o Samoa ua aga’i mai e faamautū ma nonofo i le aai tele o Aukilani.  

O le Mafutaga a Faafeagaiga, sa tutū malosi e lagolagoina le iai o se Fono Faufautua, ma o le to’atele o i latou ua fai i lagi le folauga ae sa faaauau ai pea le Fono Faufautua mai le tele o na tausaga se’i o mai I Ienei taugasa 2025.  

O se tasi o Anavatau a le Fono Faufautua a Samoa i Aukilani o le lagolagosua atu lea i le Ofisa a le Konesula a le Malo o Samoa e autovaa mai i Aukilani i lea paea’iga ma lea paea’iga e tusa ma tofiga a le Malo o Samoa.

O le faamaopoopoina o Samoa i Aukilani i matāupu e aafia ai le pulega faaitumalo poo local city councils faapea foi matāupu lautele ma tulafono a Niu Sila, o le Fono Faufautua sa fai ma leo o Samoa. 

O le laulauafono a le Fono Faufautua a Samoa i Aukilani sa se’ei i le tolu tausaga ua tuana’i sa avea ai le Afioga i le Tootooalii ia Tofilau Ted Stanley ma ta’ita’ifono.  

O le Failautusi ma le Fofoga o le Fono sa tauave e le Susuga Leiataualetauā Savea Seiuli Peseta Al Harrington Tumanuvao Lavea.