O le Aso Gafua o lenei vaiaso na tuuina atu ai a tatou talafou, e tusa ai ma lipoti i le maliu o se pepe 2 masina le matua, ona o se faaletonu i le malosi o le fualaau poo le vailaau na tuuina atu mo sia ‘alu’alutoto.
Ona o le tugā tele o le aafiaga ua tula’i mai, o lea na tutū malosi ai mātua o Bellamere ina ia toe iloilo tulafono ma fai iai ni suiga, ina ia fai ma tulafono le tatau ona mata’itūina ma siaki faalua e tagata faigaluega o faletalavai poo pharmacies ia talavai a tagata ma fanau, aemaise tulaga o le malosi faatulagaina ua tuuina atu e le foma’i.
O le finau ua lagolagoina e se tasi o sui sinia, a o se tasi o le pulega o le sosaiete o Pharmacist and Pharmaceutical ia Lanny Wong.
Faailo e Wong e tatau lava ona faia lea suiga, mo le lelei o galuega faatino, a ia mautinoa le sa’o ma atoatoa lelei fua faatatau o le malosi o fualaau e tuuina atu i tagata lautele.
Faamanino foi e Lanny Wong, i le tuuina atu o le fualaau lenei e ta’ua o le phosphate e fai lava sina lavelave.
Ta’ua e le tama’ita’i, a oo ina iai se talavai e aofia ai lea ituaiga fualaau, e moomia le maioio lelei o le fuaina o le malosi o le fualaau, ae moomia le mataala ai o le tagata o loo nafa ma lenei galuega.
Ae, i le faaalitino ai e le tama’ita’i fomai – i tomai i fualaau ma vailaau o le soifua mālōlōina o lona lagolagoina o lea finau ma fuafuaga, ae ua ia faaalia foi itu o loo iai ni aafiaga i lea matātā, e pei o le lē lava o alaga’oa ma tagata e faatino ai le tele o nei galuega.
Mo le silafia, o lenei matāupu, na lipotia mai ina ua maliu Bellamere, ona o le maualuga tele o le fua o le malosi o le fualaau o le phosphate na tuuina atu e le faletalavai i Manawatū.
Ua tuuina i mātua o le tamaitiiti fualaau i lona malosi e 500 milikalama o le malosi e talafeagai pe fetaui mo tagata matutua ae lē o se pepe 2 masina.
Ua faasolo nei su’esu’ega a le Matāgaluega o le Soifua Mālōlōina, o le Health New Zealand, Medsafe, faapea le laulauafono faletalavai i Aotearoa i lenei matāupu.
Ua faamaonia mai foi e le Minisita o le Simeon Brown le aga’i ai o le latou e faatautaia o ni sa’ili’iliga e amata iloilo ai vaega tāua o le matāupu, ae o le iloilo ai pe ono faatino ni suiga mo le lumana’i.
Puna o Faamatalaga: https://www.rnz.co.nz/news/national/568274/clinical-director-supports-law-change-calls-after-two-month-old-dies
