E lagolagoina  e le sui o Satupaitea le Afioga Lautafi Selafi Purcell le Tulafono taufaaofi o loo i talanoaga i le Palemene i le vaiaso nei.

Na ta’ua e Lautafi e ao ona ona silafia e lo tatou atunuu o le agai lea i luma o le lalolagi, ma ua tatou iai i se lalolagi o tekonolosi.

Sa saunoa foi afai e lē talia e Samoa lea tulaga lona uiga o le atunuu o tatou e lē agai i luma ae o i tua.

E lagolagoina e le sui suiga ua faatulai ma ia faapea ai e tatau ona tatou tilotilo i se system faapalota ua tatau ona sa’o lelei ma filemu ai le atunuu.

Sa ia ta’ua le lē misi ai o komisi suesue i le mae’a ai o se faigapalota, ma e fiu lava foi e tapena Tulafono o faigapalota e fai lava le komisi i le mae’a ai o se palota e auiliili ai faaletonu.

Sa ia faapea ua tatau ai ona tilotilo lo tatou malo i se auala e aveese uma ai faafitauli o tulai mai.

Ma o le tali o lena mea ia lava tapena, o le ala lea na te lagolagoina ai le tulaga ua faatulai, ma ua tatau ona faafou.

Pau lava lona popolega o le taimi faapei foi o isi sui.

E faigofie lava le suiga o le system ma avatu le malosiaga i le Komesina ma lona ofisa peitai e lē o se galuega faigofie ma e lē o se tamai laasaga foi.

Sa ia faaleo foi le tulaga ua uma ona fai mai e resitala mai online tagata mai fafo ae oo mai se taimi mo le faia o ata ma tulagalima peitai na ia faalogologo atu ananafi ua ta’u le palota mai o tagata online mai fafo.

Sa tulai le Minisita o Faalapotopotoga Tuma’oti a le Malo, ia Leatinuu Faumuina Wayne Sooialo ma ia faauilavea i lea tulaga ona e leai se tulaga faapea o iai le Tulafono.

Na pau lava le tulaga o loo talanoaina o le lesitala online o tatou tagata mai fafo ae iai se taimi oo mai e faatino isi tulaga uma o le lesitala.