O le faatūina ai mo le taimi muamua o se vaega o le matāgaluega o leoleo, falepuipui ma le toe fuata’ina e su’esu’e ai ma sa’ilia foi gaioiga solitulafono e māfua mai i fesoota’iga faatekonolosi poo le Cyber Crime Unit, o se auaunaga a malu o le malo i lo tatou atunuu ua matuā lagolagoina e le tama’ita’i Komesina fou o leoleo a le Malo o Ausetalia.
I lana ulua’i saunoaga i se polokalame ma tusitala o lea atunuu e ta’ua o le Press Club, sa faailoa ai e le tama’ita’i Komesina o leoleo a le malo o Ausetalia o Krissy Barrett, o Samoa o se isi faailoga tāua lea o le mautali atu i gaioiga faasolitulafono mai fesoota’iga faatekonolosi mo atunuu o le Pasefika.
O lea taumafaiga o loo fesoasoani ai leoleo a lea malo e una’ia lona faavaeina i auaunaga uma a leoleo i atunuu o le Pasefika.
