O le afa o le tasi i le aoauli o le aso Lulu 16 o Oketopa ao vevesi le atunuu femalagai e siaki a latou ato ma tusi folau, ae faalogoina loa le leo o le faailoilo i totonu o le malae vaalele i Aukilani.
O le umi na tatagi o le faailoilo faatasi ai ma faasalalauga o loo tuuina mai i le atunuu na vave ai ona lolofi tagata malaga i fafo mo le saogalemu. E oo foi i tagata uma o loo faigaluega i soo se matata i totonu o le malae vaalele na alu uma le solo i fafo aua le saogalemu.
Pe tusa ma le afa itula o laulau tutu tagata i fafo i le mu tinitini o le la ae faatoa taunuu atu le tamai taavale a le fuimu, ae pe tusa ma le lima minute talu ona taunuu atu le tamai taavale ae faalogoina loa leo o loli fuimu lapopoa e lua o faanatinati i le isi itu o le malae vaalele.
Toetiti atoa le itula o faatalitali pea tagata i fafo ae faatoa toe sau le vaalau i tagata uma e agai atu loa i totonu mo le amatalia o galuega ae faapea foi i tagata o loo malaga i o latou atunuu. Na tau iai le popole o tagata malaga i le mea sa tupu, ona nei avea ma tulaga e faatuai ai malaga ua faatulagaina i loa taimi tonu e tatau ona alu ai.
Peitai na logoina lava e tagata o loo galulue e kamupani vaalele le mamalu o le atunuu e leai e mea faapopoleina ai e tuanuu lava le malaga a le vaalele i lona taimi sao. Ma o le fiafiga sili lea i tagata malaga aemaise lava i tatou tagata Samoa lea sa malaga i le Air New Zealand i le afa o le tolu.
Ae na taua e se tasi o tagata faigaluega o le malae vaalele ina ua fesiligia e le tatou polokalame le mafuaaga o lea faailoilo, ae na faapea mai ose asuasu na iloa i le isi itu o le pito i luma o le malae vaalele na mafua ai ona vave oso le faailoilo mo le saogalemu o tagata. Na faapea mai foi e leo se faafitauli tele ona sa vave ona toe foi tagata i totonu o le fale aua le faaauauina o latou malaga.
