O le tausaga e 2014 na faamautu ai le maliega i le va o taitai o le Malo o Samoa ma taitai o Amerika Samoa, e faia se faafesuiaiga o fanua e avanoa ai ona faatu se ofisa o le Malo o Samoa i Tutuila ma Manu’a, ae faatu foi se ofisa o le faigamalo i Sasa’e i totonu o Samoa Tutoatasi.
I le iva la tausaga talu ona faamautu lea sainigalima ma faatuina loa le ofisa o le Konesula o Samoa i Amerika Samoa, o le fono o le Atoa Samoa na usuia i le teritori ia Iulai o le tausaga e 2022 na toe lalaga ai le maliega ma amata ai loa ona faagasolo fuafuaga o le faatuina o se ofisa o le Malo o Tutuila ma Manu’a i Apia le laumua o le Malo o Samoa.
O se eleele o le Malo o Samoa i Taumeasina e tulata i le sami e silia i le eka lona telē o le a fausia ai lea ofisa o le faigamalo i Sasa’e, ma na aloaia i le sauniga o le suaina o le eleele sa tomua i le sauniga lotu na taitai e le Peresetene aoao o le Ekalesia Metotisi ma pese na lagiina e le aufaipese a lea ekalesia mai le laumua o le ekalesia i Fogaa i Faleula.
O le sauniga na auai taitai ma sui o faigamalo a Samoa e lua i le afioga i le Kovana ma le tamaitai Palemia.
Na saunoa le taitai o le faigamalo a Amerika Samoa ma faafetaia le Malo Tutoatasi i le eleele ua tuuina atu, o se faailoga o le galulue faatasi ma le fetausia’i.
Na saunoa le taitai o le Malo o Samoa ma ia toe faama’alo i’u’ofe le va nonofo o Samoa ua mae’a ona faataoto e mātua ma tuaa ua fai i lagi le folauga.
Ni vaega o saunoaga mai taitai o faigamalo a Samoa e lua le Kovana o Amerika Samoa, Afioga Lemanu Peleti Mauga, ma le Palemia o le Malo Tutoatasi o Samoa, Afioga Fiame Naomi Mata’afa.
O le maliega o le fesuiaiga o fanua ua faatu ai le ofisa o le Konesula o Samoa i Tutuila ma Manu’a, ma le ofisa o le faigamalo a Amerika Samoa i Apia e le o ni lisi.
