Ua faalauiloa mai e Isaraelu le faataatia ese mo le taimi nei o ni gaioiga faamiliteli i totonu o Gaza ina ia mafai ai e tagata ona maua ni fesoasoani a o faaauau ai pea le leotele mai o le finau a tagata mai isi atunuu ina ia faailoa lo latou lē fiafia i le pagatia o iai tagata i Gaza.
Lipotia e le CNN ua faatupula’ia pea le valaau o atunuu ia Isaraelu ina ia taofia a latou fuafuaga faamiliteli i totonu o Gaza.
O le taofia la o vevesi ma osofa’iga a Isaraelu o le a maua ai ma le avanoa o le militeli e faatino ai nisi o a latou fuafuaga mo le kilivaina o taumafa i tagata ua matua’i fia aai.
O loo aga’i foi i luga le aofa’i o tagata ua maliliu ona o le fia taumamafa.
O le fesili o loo fesili ai le to’atele pe o le ā le umi o le a iai le nofo filemu i nei atunuu.
O loo fesili foi nisi pe faamata e lava le taofia o nei vevesi e toe faafoi ai i le tulaga na iai atunuu.
O le taua lava ma le Hamas ua afua ai ma ua lata i le 2 tausaga o faia pea lea taua ma o loo ma’umau pea soifua.
O le kilivaina o uta ma sapalai o taumafa ma fesoasoani sa faalavelavea i fetauiga ma ua faigatā ai le tufatufaina o ia fesoasoani mo nai tagata o loo pagātia.
Puna o Faamatalaga: https://edition.cnn.com/world/live-news/israel-hamas-gaza-news-07-27-25
