Ua faia osofa’iga a Isaraelu i le itu i Saute o Lepanona ma le faamatalaga o loo aga’i ia osofa’iga i le Hezbollah e tali atu ai ia latou taumafaiga o loo faatino e toe faufau ane nisi tulaga i lea faaitu.
O le faamatalaga mai le vaega o le puipuiga a Isaraelu ua ta’ua o loo taula’i osofa’iga i nofoaga e teu ai ‘au’upega e umia e le Hezbollah ona o loo galulue nei le vaega lea i le toe faufauina o ona si’omaga faatupu faalavelave i le itu i Saute lea o Lepanona.
Ua faailoa e le CNN le tali a le Peresetene o Lepanona i ia gaioiga a Isaraelu, fai mai Joseph Aoun o osofa’iga nei ua solia ai tulafono faavaomalo ona o loo aafia ai ma tagata lautele ma faamalosia ai i latou e aga’i ese mai o latou fale.
Fai mai le Peresetene o le tele lava o taimi e taumafai ai Lepanona ia maua ni feutana’iga filemu ma Isaraelu, o le tele foi lea o taimi e faatupula’ia ai gaioiga faasagatau a Isaraelu ia Lepanona.
Ua valaau se vaega o le faalapotopotoga o Malo Aufaatasi, le UNIFIL poo le United Nations Interim Force i Lepanona ia Isaraelu ina ia taofia osofa’iga ona o loo lamatia ai ma tagata lautele.
Fai mai o loo tālia le i’uga o se fonotaga a le Kapeneta a Isaraelu e tusa o lenei matāupu.
Puna o Faamatalaga: https://edition.cnn.com/2025/11/06/middleeast/israel-strikes-lebanon-hezbollah-intl
