Ua ioe i moliaga o le fasiotia o lana fanau e toatolu le tina e suafa ia Margaret Dale Hawke.
O nai tamaiti ia na maua atu o latou tinomaliliu i le mae’a o le sasao ane o se afi i le fale o lo latou aiga i Port Headland i le tu i Sisifo o Pilbara i Ausetalia nei.
O tamaiti e 10 tausaga o le teineititi ma ona tuagane e toalua e lima masina ma le fitu tausaga o le isi.
O le tali i ona moliaga na faailoa e lea tamaitai i le aso ananafi ina ua tulai i le faamasinoga i Perth e faaaoga ai le video link mai le falepuipui o loo iai.
Ua ia ioeina foi moliaga o le faaleagaina faasolitulafono o mea e ala i le afi ma ua toe taofia nei i le vaaiga a leoleo seia toe valaauina le mataupu lea i le faamasinoga maualuga ia Aperila.
E ono soloatoa lea tamaitai i le falepuipui auā o lea ua ia ioeina ona moliaga uma.
