O le aoaoga lenei o loo auiliili ai le tulaga o loo iai le malupuipuia o nofoaga o loo iai faasao o le siosiomaga e aofia ai faasao a le Malo ma faasao o loo i vaega faitele.

O lenei aoaoga sa faapupula ai e le Matagaluega o Siosiomaga le tāua o le auai faatasi i lenei aoaoga ina ia faasolo ai i luma le aoina o faamaumauga ma faamatalaga ina ia mautinoa o loo lelei atoatoa le puleaina o nei faasao.

E pei ona faailoa mai i pepa o faamatalaga mai le ofisa o nafa ma polokalame faalesiosiomaga a le Pasefika poo le S.P.R.E.P. na faalia ai e le Faatonu Sili, Sefanaia Nawadra lona iloa i nofoaga o loo malupuipuia i le Pasefika.

O loo iai le manatu e iai le sootaga o nofoaga o loo faatino ai faasao o le siosiomaga ma nofoaga o loo puipuia nei e agai lea i manaoga o tagata o le atunuu i vaega o loo iloa e ave ai le faamuamua ona o le maualuga o le pasene o fanua i le Pasefika o fanua umia saoloto.

E pei ona iai le autu o lenei aoaoga mo i latou o loo auai ai ina ia mafai ona faalauaitele le silafia ma le tomai i vaega uma e agai ai le auaunaga e tusa ma ona taiala ma o loo aofia ai sui mai Matagaluega o le Malo ma faalapotopotoga tuma’oti aemaise nuu ma afioaga o loo faatinoina ai faasao o le siosiomaga.

I faamaumauga, o Samoa e fai lava si tele o nofoaga o loo faatino ai faasao o le siosiomaga ae peitai e lei oo ai ni iloiloga ma e le o iai foi ni faamaumauga o avanoa mo nei vaega.

O le iloiloga o nei nofoaga o se vaega tāua lea i le auaunaga faalesiosiomaga ma e ao ina faatautaia i le tele o taimi ina ia mautu faamaumauga o nei nofoaga faasao e agai i fuafuaga ma taiala ina ia ausia.

O lenei aoaoga o loo faagasolo le vaiaso nei e aofia ai ma galuega faatino i nofoaga faalesiosiomaga o loo puipuia ma ana faamaumauga.

O lenei aoaoga o loo faatino lea e le Matagaluega o Siosiomaga ma le Ofisa o Polokalame faalesiosiomaga a le Pasefika (S.P.R.E.P.).