O le vaiaso nei o le a iloilo ai e le Kapeneta le lipoti o faiga faavae fou mo le filifilia o tagata i galuega faavaitaimi e pei ona faailoa e le minisita o le matagaluega o leipa o loo vaaia lea polokalame le tofa Leatinuu Wayne Sooialo i le polokalame o le Soalepule a le faletelevise o le EFKS.
O lea ua taunuu i le laulau a fono a le Kapeneta le lipoti a le komiti faapitoa a le Kapeneta sa toe iloiloina atoa aiaiga e filifili ai tagata e agavaa ma talafeagai tonu iai avanoa faigaluega faavaitaimi.
O le isi o suiga e tusa o fuafuaga o ia galuega o le tuuina atu lea i ofisa o fono faavae a itumalo faapalota e gafa ma le sailia o tagata faigaluega mai itumalo, ma le toe tuu saunoa ai le faiga sa faatino muamua ai, ma le tasi itu tāua o le lē toe sau o le kamupani i fafo agai loa saili ana tagata faigaluega, ae faamuliga i le saili o le fesoasoani e maua ai visa mo ana tagata faigaluega mai le auaunaga a le matagaluega o leipa.
Ua faailoa foi e le minisita ua faamautu nei le toalua o sooupu i Niu Sila ma Ausetalia mo galuega faavaitaimi, ma o le vaiaso nei e faailoa ai i laua ua faamanuiaina mo ia avanoa faigaluega.
