O tapenaga a le faamasinoga i le tagofia o matāupu faasino i tagi o le palota ua toe fetuuna’i uma ai aso ma masina faapea taimi e fofogaina ma su’esu’eina ai isi matāupu a le Faamasinoga Maualuga, ae ave le faamuamua e su’esu’e muamua ai tagi o le palota.
Peita’i ua faaleo e le faamasinoga atugaluga i le mae’a faatulaga ai o le Aso Lua o le vaiaso nei e amata valaau ai molimau o le matāupu tau palota mai Faasaleleaga 2 ma Falealili 1, ae oo atu ai ma ni suiga i le toe faailoa e loia ua manana’o itu na faauluina moliaga e toe ave i tua.
O Faasaleleaga 2 ua finagalo lē na faauluina le tagi e ave i tua, ae o Falealili 1 ua finagalo uma le sui na tagi ma le sui ua molia e faaui uma i tua a la moliaga.
O le Aso Lulu lenei o le a toe valaau ai le tagi mai Faasaleleaga 2 o le a iloa tonu ai le ta’otoga o lea talosaga pe talia pe faaauau.
O le matāupu mai Falealili 1 o le Aso Tofi o le vaiaso nei e toe valaau ai, ma e tatau ona faailoa ai e loia a le itu na tagi ma le itu ua molia poo ā tonu māfua’aga o le ave i tua.
Ua mae’a taimi sa tatau ona faailoa ai ni tapenaga faapea ina ia uia ai ala faaletulafono ua faataoto e le faamasinoga e faatino ai sea tulaga.
Peita’i ua mae’a le taimi sa ono faia ai lea tapenaga ma ua mautū le saga’i atu o le faamasinoga e su’esu’e molimau, ae peita’i ua faailoa ai ma le taumafaiga e faasolomuli i tua.
I le fofogaina o le matāupu mai Faasaleleaga 2 sa ave le avanoa e le faamasinoga i se matai o lea itumalo sa sii lona aao, e faailoa atu lona finagalo.
Na faailoa e lea matai ua talia e le itumalo le finagalo ua faailoa atu e lē na faauluina le tagi sa se’ei i le tofi o lea itumalo le afioga Magele Sekati Fiaui, e ave i tua lana tagi.
Peita’i na saunoa le tama’ita’i Faamasino le afioga Leutele Niavā Mata Tuatagaloa, o aga ia e faatino i le Faamasinoga o Fanua ma Suafa ae o le Faamasinoga Maualuga e lē mafai ona e mulimulita’ia ala o le tulafono ma aiaiga ua faataoto e avea ma faasino ala i galuega a le faamasinoga.
O taualumaga o lea matāupu e pei ona toe tolopō mai i le Aso Lulu o lenei vaiaso o le a maua ai se ta’otoga o lea talosaga.
O le afioga i le Faamasino Sili le afioga Satiu Simativa Perese ma le faamasino o le Faamasinoga Maualuga le afioga Leiataualesa Darrel Clarke o loo se’ei i le su’esu’eina o le tagi tau palota mai Falealili 1 lea o loo molia ai e le sui sa tauva i le fu’a a le vaega faaupufai e puipuia aiā tatau a tagata le tofa Tuiloma Tusa Laniselota Lameko le sui tauva na manumālō le afioga i le faipule o le itumalo le afioga Toelupe Maoiautele Poumulinuku Onesemo.
O afioga i Faamasino o le Faamasinoga Maualuga le afioga Leutele Niavā Mata Tuatagaloa ma le afioga Loau Donald Kerslake o loo se’ei i le su’esu’eina o le tagi tau palota mai Faasaleleaga 2 lea o loo molia ai e le sui tauva o le Faatuatua i le Atua Samoa ua Tasi sa se’ei i le nofoa o lea itumalo i le paea’iga ua mavae le afioga Magele Sekati Fiaui, le sui tauva o le vaega e puipuia aiā tatau a tagata ua tauaveina nei le nofoa o le itumalo le tofa Vaaelua Senetenari Samau.
O le matāupu tau palota poo le tagi mai le itumalo o Falealili 2 ua faagasolo ona su’esu’eina molimau.
O le tagi lea a le sui sa tauva faatuto’atasi le afioga Fuimaono Maria Tuatagaloa Meredith ua ia molia ai le sui faipule ua toe filifilia o lea itumalo le afioga Fuimaono Maiava Tito Asafo, sa tauva i le fu’a a le vaega faaupufai o le Faatuatua i le Atua Samoa ua Tasi.
O loo iai foi moliaga a le faipule faasaga i le sui na faauluina le tagi.
