Ua lē taunuu ona faatino le fuafuaga a le sosaiete a foma’i o le suia i le na o le valu itula e galulue ai foma’i o loo tautuaina le matagaluega o le soifua maloloina pe a oo mai i le masina lenei o Iulai.

Ua faaalia e le Peresitene o le sosaiete a foma’i le susuga Taulealeausumai Dr Titi Lamese, ua silasila alofa le sosaiete i le atunuu, ae o feutanaiga ma le komisi o galuega a le Malo i le mataupu i ovataimi o foma’i ma isi faamanuiaga tau totogi o le a faatalatalanoa pea.

Ua tuu atu foi le manaoga o le sosaiete i le komisi o galuega a le Malo ina ia faapepa uma aiaiga ua latou folasia.

Se finagalo o le Peresitene o le sosaiete a foma’i i le feiloaiga ma tusitala i le Aso Faraile na tea nei, lea na faailoa ai foi se lagona faanoanoa o le sosaiete e ala mai i le Peresitene ona o saunoaga a le Minisita o le Soifua Maloloina ma le taitai o le Malo i le Palemene.

Faaalia e le Peresitene e leai ni faiga faapolokiki i totonu o le faaiuga a le sosaiete. 

Le susuga Taulealeausumai Dr Titi Lamese o le Peresitene o le sosaiete a foma’i Samoa.