Ua galulue faatasi nei le auaunaga tau soifua maloloina o loo faafoe e le Malo, ma le tautua faalesoifua maloloina o loo galulue i le vaega tuma’oti, i se taumafaiga e tuufaatasi se faamaumauga o tagata o le atunuu mai fanau e oo i tupulaga talavou ma le au matutua, ua aafia i le ma’i suka.
O se galuega fai faatasi lenei ua fausia ai ma se ta’iala e galulue ai auaunaga tau soifua maloloina uma i le atunuu e togafiti ma ofoina atu fautuaga mo le puipuia o o tatou tagata mai lea gasegase lē pipisi, ua matuā maualuga le numera o o tatou tagata ua maua ai.
Ua faailoa i se pepa o faamatalaga mai le matagaluega o le soifua maloloina o le taimi nei e 200 gasegase ua faamamā o latou toto ona o aafiaga o o latou fatuga’o mai ma’i lē pipisi e pei o le suka.
O faanaumauga foi a le soifua maloloina ua manino mai ai le faatupulaia o le aofaiga o o tatou tagata ua maua i lea gasegase i le silia ai nei ma le 35 tausaga, o loo pine lea tulaga i nisi o faamaumauga o loo faailoa ai e toatasi mai le toalima tagata i le matutua o le soifua e 18 i le 64 ua ma’i suka.
O se tasi lenei o gasegase ua avea nei ma avega mamafa i fuafuaga tau tupe a le Malo, aemaise o loo faapena ona aafia ai le lotoifale o aiga ona o le tausiga o o latou tagata ua aafia i lea lava gasegase.
O nisi o aafiaga ogaoga o le suka o le faaletonu ai o fofoga poo mata ma o nisi ua iu ai lava ina po le vaai.
