Ua faalauiloa se taumafaiga fou a le Crimestopper e agai sa’o ia i latou e fiafia e faia osofaiga e faaleaga ai pisinisi i taavale ma gaoia lea e faaperetania o ram raiders.
Ua faailoa i faamaumauga mai leoleo ua toe siitia foi le numera o nei ituaiga osofaiga.
Amata atu i le aso ananafi o le a tuuina e le Crimestoppers posters i nofoaga e taatele ona tutupu ai ia ituaiga osofaiga e le gata i Aukilani, Hamilton ae faapea foi Kalaiesetete ma unaia ai tagata ina ia logo ane ni faaletonu e ono vaaia i o latou faaitu.
E le gata i lea ae o le campaign o le a aofia ai foi ma le faia o faalauiloa i luga o upega tafailagi ma le social media.
Saunoa le faauluuluga o lea ofisa Hadyn Smith i le televise a Niu Sila o le taimi nei o ram raiders lea ua sili i le lisi o faalavelave i le taimi nei ma o loo malamalama e iai tagata o loo silafia faamatalaga i le tele o nei faalavelave peitai o loo fefefe e tautatala ane aemaise lava pe afai e aofia ai ni kegi.
O le naunautaiga ia taofia ma faaititia le aofai o nei ituaiga faalavelave ma ia maua foi se nofo filemu i tagata ma le aufaipisinisi.
