O le auaunaga a le faalapotopotoga ua ta’ua o le GOSHEN Trust o loo tausia ma vaaia nisi o alii ma tamaitai talavou faapea nisi ua tino i matutua ua aafia i gasegase o le mafaufau, o se auaunaga tāua tele, auā ua mafai ona avea ma laveai i le ofoina o le fesoasoani mo ia tagata o le tatou atunuu.

O Moamoa o loo iai i le taimi nei le nofoaga o loo faagaioia ai lea auaunaga ma tautua, peitai ua iai nei se fuafuaga e fausia sona nofoaga fou i Avele i se fanua o le Malo ua tuuina atu i le GOSHEN Trust e faagaioia ai lana galuega fesoasoani mo tagata ua aafia mafaufau i gasegase ma faafitauli o le olaga nei.

O le afioga i le Minisita o le Matagaluega o le Soifua Maloloina faatasi ai ma sui o lea faalapotopotoga tuma’oti na latou suaina le eleele e faailoga ai le fausia o se nofoaga fou i lea fanua o le malo e sosoo ma le nofoaga fou o le Amepasa o le Malo o Saina i Samoa.

O le minisita o lea matagaluega a le Malo le afioga Valasi Luapitofanua Toogamaga Tafito Selesele, na saunoa i le sauniga ma ia faailoa le taua tele o lea tautua mo nai o tatou tagata ua aafia i gasegase o le mafaufau.

Faaalia e Valasi o le tuuina atu o se fanua e le Malo mo le fausia ai o se nofoaga e faapitoa i le vaaia ma le tausia o i latou ua maua i le gasegase o le mafaufau, o se faatofalaiga taua a le Malo mo le vaaia lelei o o tatou tagata ua aafia mafaufau.

Na faailoa foi e le Minisita i lana saunoaga o se galuega fai faatasi a tagata uma le tineia ma soloia i lalo pa o aafiaga o le mafaufau o soo se tagata ma ofo iai le fesoasoani silisili ona latou manaomia.

Ua faafetaia ai e Valasi le susuga Papalii Tavita Moala o le taitaifono o le Komiti Faafoe o le NPF, o le afioga Taimalie Charlie Westerlund ma le matagaluega o puna’oa faalenatura ma le siosiomaga i le lagolago, faapea le Malo o Iapani o le a faatupeina le nofoaga fou.