I le 17 miliona tala ua mae’a faaalu e le Malo e fausia ai le isi malaevaalele i Tiavea, ae ua lē faaauauina e le faigamalo a le Faatuatua i le Atua Samoa ua Tasi, o lea ua faailoa i se fuafuaga a le Matagaluega o Galuega Tetele a le Malo le avea o lea nofoaga ma fanua e faatutū ai apa iila e maua ai le eletise mai le malosi o le lā, poo se solar panel power station.
Ua faailoa lea fuafuaga e le minisita o lea matagaluega a le Malo le tofa Olo Afoa Fiti Vaai, i se faatalanoaga i le polokalame o le Soalepule.
Ua faailoa ai e le minisita e sili atu ona tāua le faatu ai o se nofoaga e maua ai le eletise mai le lā, e mafai ona maua ai e tagata uma i le motu o Upolu le eletise, ma afai foi ae manuia lea taumafaiga o le a palasi ai ma le tau o le eletise e maua e aiga.
E lei faailoaina e le minisita poo afea e faatino ai lea fuafuaga, ae na saunoa Olo i le polokalame, sa mafaufau lava poo le ā tonu se atinae e faaaogā tatau iai le eleele ua mae’a ona tapena mo le malaevaalele, ona o lana silasila e lē tele ni vaalele e afea le nofoaga pe afai e faaauau le fuafuaga a le faigamalo talu ai, ae a faatū ai se nofoaga e maua ai le eletise mai le malosi o le lā, o le a toatele tagata o le atunuu e manuia ai.
E pei ona silafia o le fuafuaga o se isi malaevaalele e pei ona fausia ai le atinae i Tiavea i fuafuaga a le faigamalo sa tu i le foe a le vaega faaupufai e puipuia aiātatau a tagata, sa taulai i le tulaga o le atinae o tagata tafafao mai fafo auā e tele faletalimalo i lea vaega o le atu Aleipata, aemaise o fale apitaga tu matafaga poo beach fales.
