O le Aso Toonai na tea nei na faatauina ai le 50 taga talo i Papakura sa auina atu i le vaalele mo Niu Sila i le masina na tea nei i Aukilani.
Ua faamautu mai e le Afioga Seuamuli Kome Lauano o se tulaga lelei lea i le lolofi atu o tagatanuu Samoa o loo aumau ai i Aukilani e faatauina le talo i lona faleoloa.
“Ua lēlavavā e o tatou tagata taumafa i le talo Fiti ma o loo faatauina lava i se tau taugofie, o le faamoemoega lava ia faamalieina le auaunaga, o le tele o tatou tagata mai Aukilani atoa lea na faatauina tatou talo na auina mai Samoa.”
Na ia saunoa ai o loo fuafua o le faaiuga o le masina nei lea o le a toe utaina ai le isi 100 taga talo mai nisi o faifaatoaga i le atunuu.
“Ua mae’a ona fetuunai foi ma nai faifaatoaga lea o le a aumai le isi uta talo.”
I le faatalanoaga muamua ma le Afioga o le ituaiga talo o loo manaomia mo lenei uta.
“E na o le talo piniki ma le talo mūmū lea e faaalu ai tatou uta e le manaomia le talo lea e ta’ua o le talo vave poo le talo e lanu meamata lona tiapula ona e ese foi e faatusatusa i le ea a Niu Sila.”
E ui i le maomao o nisi o nofoaga o loo aumau ai tagata Samoa i nisi o vaega o Niu Sila, ae na saunoa Seuamuli, “e tatalo atu i nai o tatou tagata e onosai mai e oo atu lava le faasoa.”
“O loo fuafua a mae’a le trial period mo Niu Sila atoa ona oo atu lea o a tatou uta talo nei i Amerika ma Ausetalia.
“O le auga lava ia fesoasoani i nai a tatou faifaatoaga i Samoa e patino lava mo nai faifaatoaga o loo tau atia’e i totonu o nuu ma afioaga.”
