O le taeao nei lea na tatalaina ai le amatalia o se mafutaga faaleaoaoga a Afioga i Faamasino o le Faamasinoga o Fanua ma Suafa e fesoasoani lea i la latou auaunaga o loo ofoina atu i le atunuu.
I lenei faamoemoe sa saunoa ai le Minisita o Faamasinoga, Matamua Seumanu Vasati Sili Pulufana e tusa ai o le auga o lenei aoaoga.
“O le auga o aute o lenei mafutaga faaleaoaoga mo a outou faamasino o se faamaite tāua ina ia mafai ona tali atu le faamasinoga o fanua ma suafa i le atunuu lautele e autovaa ma sulufai mai mo a latou mataupu tau fanua ma suafa.
“E faafetaia ai le tautua a le vasega o Faamasino a le Faamasinoga o Fanua ma Suafa i la outou tautua tuavae i galuega ma tiute i aso uma.
“O le upu moni e lē asa se faiva ma se ma’umau e leai foi se atoatoa o se faatinoga auā e poto lava le tautai ae sese lana atu i ama.
“Atonu o le agaga tonu lea o lenei faamaite ia faatino pea aoaoga faapenei ina ia faalauaitele ai le silafia i le faatinoina o le galuega faa-Faamasino.”
“O la’u maitau e lē utuva faitioga ma finagalo faaali o le atunuu ona o a latou mataupu faa-Faamasinoga tau fanua ma suafa.”
E pei ona ta’ua e le Minisita e lē mafai foi ona faamalieina uma finagalo ma’ema’e ma le lē fiafia o le atunuu e tuuaia ai tautiga o afioga i Faamasino.
“O le natura faa-Faamasinoga e iai le itu e malo e iai foi le itu e malolo malie outou finagalo e ao pea ona faailo nisi o faitioga e oo mai i le ofisa o le Minisita e faatatau lea i mataupu e ono fesiligia ai e le atunuu la tatou tiute.
“O so’u manatu vaivai e na o le tasi lava le auala e tali atu ai i nei faafitauli o le tapenaina ma le saunia lelei o faaiuga tusitusia a le faamasinoga e ui e lē o se galuega faigofie ae o le itu mautinoa e lē tuu aunoaina lo outou tautiga.
“O le faamoemoega maualuga a le Malo o le tuuina mai o le lagolago malosi i le Peresitene ma le vaega o le faamasinoga o fanua ma suafa i itu e oo ai le fesoasoani ina ia saga tu maualuga ma tu matila lo outou valaauina.”
