O lenei fonotaga o loo auai sui o le Palemene a Samoa i Mongolia i le folasia ai o mataupu ma manatu o sui faa-Palemene mai le Pasefika ma Asia e patino lea i le soifua maloloina.
O le autu o lenei fonotaga o le faasoa lea i mataupu ma mau maumaututu mai atunuu o loo auai i vaega o auaunaga e ofoina atu e le soifua maloloina.
O sui mai Samoa o loo auai ai e aofia ai le Afioga Niuava Eti Malolo ma le Afioga Maulolo Tavita Amosa.
I le faagasoloina o polokalame a le fonotaga na mafuli ai le saunoaga a le Taitaifono Zandanshatar Gombojav e faailoa le faasologa o le faitau aofai, faama’i e ona tulai mai ai ni lu’itau tetele mo faiga faalesoifua maloloina i le lumanai.
“I le tele o luitau o loo feagai ma le lalolagi e tāua ai le taitaiga a taitai a Malo o le galulue faatasi i soo se vaega mo se vaifofo e foia ai nei faafitauli.
“Ina ia faatapulaaina le faateleina o tupe faaalu mo le soifua maloloina, puipuia tagata mai lamatiaga tau tupe e fesootai ma le soifua maloloina ma faateleina le soifua maloloina o le faitau aofai o tagata.
“E tatau ona tatou toe asia ma faaleleia le faalapotopotoga, faatupeina ma le faasoaina o puna’oa mo le soifua maloloina ma auaunaga.”
O se tasi o vaega o lenei fonotaga o le asiasia lea o nisi o maota o loo faatino ai auaunaga faalesofiua maloloina a Mongolia ma auaunaga tau le soifua maloloina i nuu ma afioaga e aofia ai le atina’e lea o le maua uma e tagata uma o nei auaunaga faatasi ai ma le tupe faatatau o loo faaaogāina ai.
