O le tauaofiaga a le fono lona 69 a le Komisi o Malo Aufaatasi o loo lipoina ma silasila i le faaleleia o tulaga o tamaitai i atunuu o le lalolagi sa avea ai le tamaitai Ofisa sili o le Matagaluega o Tina ma Tama’ita’i Atina’e o Afioaga ma Agafesootai, le afioga Loau Donina Va’a, ma sui o Samoa e faaleo nisi o fautuaga e fai ma sao o le tatou atunuu i galuega e faaleleia ma siitia ai le tulaga o tina ma tama’ita’i.
O le tasi o fautuaga sa momoli e Samoa o le tulaga laugatasia o itupa o alii ma tama’ita’i, le gender equality i soo se auaunaga ae faapea i vaega tāua manaomia o le soifuaga e pei o le puipuiga malu.
O le talia e Samoa o le feagaiga faavaomalo e tetee atu ai i soo se faiga faailoga tagata faasaga i tamaitai ose isi lea o vaega taua sa folasia e le tamaitai ofisa sili ma ia faailoa ai, o le tasi lea o feagaiga o loo matua faataua e Samoa faatasi ai ma le maliega faasino ile siitia o tulaga o tina ma tamaitai ua ta’ua o le Beijing Declaratiom o le tausaga e 1995.
Ua faailoa i lea faatasiga le ausia e Samoa o le 57 pasene o le tulaga umia e tamaitai o tulaga taitai i totonu o galuega ma tautua eseese a le Malo ma o se isi lea faailoga o le lagolago atu o Samoa i taumafaiga uma a le komisi a malo aufaatasi e siitia le tulaga o tina ma tamaitai o le lalolagi.
O le usugafono a Samoa o loo taitaia e le Minisita o le matagaluega o tina ma tamaitai atinae o afioaga ma aga fesootai le tofa Lagaaia Tiaituau Tufuga
