Ua faailoa e le pule o le Tatiana Investments le afioga Afoa Faleulu Mauli, le tapena ai o lana loia e faaulu i le faamasinoga sana talosaga su faasaga i le Minisita o Tupe ma le Minisita o Tiute ma Tupe Maua, faapea le Ofisa Sili o le pulega o le Matagaluega o Tiute ma Tupe Maua.
Ua teena e le Pule Sili o lea matagaluega le talosaga a le Tatiana Investments ina ia tuu atu se 30 aso e toe tapena ai vaega uma o loo manaomia ai faamatalaga tau lisi o le fanua o se aiaiga o le laisene pisinisi.
E selau miliona tala ua faailoa e Afoa o le a ia su ai i Minisita o loo faatūtū iai lana tagi, ma le Ofisa Sili o le matagaluega o tiute ma tupe maua.
E le gata o le molia o i latou ia i tofiga faalemalo o loo latou umia ae faapea foi i o latou tulaga o tagata taitoatasi.
Ua faamaonia mai e le pule o le Tatiana Investments o le Aso Faraile na tea nei na ia tauaao ai le tusi mai le Ofisa Sili o le matagaluega o tiute ma tupe maua na logo atu ai le lē talia o lana talosaga mo se avanoa e 30 aso e tapena atili ai vaega o loo manaomia, ae na logo atu ai foi ma le taofia ona toe tatala le vaega o le fale o loo iai lana pisinisi o le faleaiga.
Ua ia faailoa i se talanoaga i le Aso Gafua, o le a ia usitaia le tulaga ua taoto ai nei le mataupu, ae o le a faatali i se finagalo o le taitai o le Malo le afioga i le Palemia e pei ona mae’a ona feiloai iai ma faamatala iai lona silafia i le mataupu o loo iai le lisi o le fanua mai le matagaluega o puna’oa faalenatura ma le siosiomaga.
Ua faailoa e le Minisita o lea matagaluega e silia i le 200 afe tala o loo nofo aitalafu ai le Tatiana Investments i le lisi o le fanua o loo iai le fale kalapu o le RSA ma le faleaiga.
