Ua folafola e le minisita o Femalagaa’iga, Michael Wood o le a suia mea e manaomia mo le skilled migrant visa i se taumafaiga e fesoasoani ai i pisinisi ia faatosina mai tagata faigaluega e faatumu avanoa e manaomia ai tomai.
Faailoa e le minisita e tele kamupani o loo saili tagata faigaluega ma o le faatulagana fou la ua faailoa nei e pei o le aveesea o nisi o aiaiga i luga o tagata malaga mai e iai tomai ma ia faafaigofie le point system e faaaogaina ina ia tosina ane ai tagata faigaluega ma mafai ai foi ona faatumauina i galuega e faatumu ai avanoa o loo manaomia.
Fai mai Wood o le aveesea o aiaiga ia o le a aveesea ai foi ma se tasi o tulaga i le system tuai lea sa faatulaga ai ma le aofai o avanoa e matala ane i tausaga taitasi.
Sa taofia ai tagata malaga mai ma tomai e nonofo i Niu Sila tusa lava pe o loo matuai iai se manaoga.
O le amataga o Aokuso lea ua fuafua e faalauiloa ai le faiga fou lenei, o tagata e maualuga tomai i galuega o le a vave atu foi lo latou ala agai i le nofomau atoa ai ma isi o le a saofia foi i le tulaga lea o le nofomau pe a mae’a se piliota e faigaluega ai i Niu Sila.
Ua faailoa foi e le minisita o le a iai foi ma se faaopoopoga i le umi o le visa Accredited Employer Work Visa mai le tolu tausaga i le lima tausaga e amata ia Novema.
Ta’ua e Wood latou te amanaia le tāua o le matafaioi a le vaega o femalagaa’iga e faia i le tamaoaiga o le atunuu i le lumanai ma o le a galulue faatasi pea ma pisinisi ia faamautinoa o loo paleni lelei lea vaega.
