E silia ma le $300,000 le tinoitupe ua foaia e fesoasoani ai i tagata na aafia i le mu o le Loafers Lodge i Ueligitone.
O le sailiga seleni lenei o loo tuufaatasia e le Wellington City Mission ma o lea ua savali le tolu vaiaso talu ona uma le mu ua ma’umau ai soifua o le toalima ae leai ni fale mo le isi vaega toatele.
E oo mai ananafi ua $309,000 le tupe ua foaia ma e lata i le $100,000 ua mae’a toe faaalu e totogi ai fale o loo faamautu ai i latou ua aafia faapea tau na totogi mo sauniga mulimuli o i latou ua maliliu.
O le tupe foi lenei o loo fai lava ma toe faailoa mai e le City Mission i tagata lautele tupe faaalu ma mea na faaalu ai.
O le faailoa mai ai o le tala o le tupe ananafi, na sau ai foi ma le tala o lea ua tuuina atu le isi $1,000 i tagata taitoatasi ua aafia e faatupe ai mea o loo mananao iai.
E ese mai i fale ma meaafale, o lea foi o loo tele le manaomia o le counsel poo le faatalatalanoa aemaise o le faamalosiau i tagata ona o le mea na tupu.
