O le masini fā’ata faapitoa (ultrasound machine) e faatino ai siaki e lē gata mo tina ma’itaga, ae faapea isi gasegase e pei o le fatu, ma soo se vaega lava o le tino o le gasegase e moomia ai le auaunaga a le masini, na foai e le vaega na malaga mai Saina e galulue i le matagaluega o le soifua maloloina.
Faaalia manino e le sui ofisa sili o le matagaluega o ia foi e gafa ma le vaaiga o lea vaega i le maota gasegase o Atoa Dr. Glenn Fatupaito le tāua o lea foi auaunaga i totonu o maota gasegase e siaki ai i latou e aafia le fatu, aemaise o tina ma’itaga.
Ta’ua foi e Dr. Fatupaito e leai ni masini faapitoa mo fā’ata i tua i falemai faaitumalo.
Peitai o loo fai a latou feutagaiga ma a latou paaga e foai mai ai ni masini faapitoa ia mo falemai faaitumalo uma e lē gata mo Upolu nei ae faapea foi ma Savaii.
Na faaalia e Dr. Fatupaito o le isi faafitauli o le lē lava o le aufaigaluega e iai le tomai faapitoa e latou te faia ai lea auaunaga.
Mo le taimi nei e na o le toatolu le aufaigaluega e mafai ona latou faatinoina lea auaunaga.
E silia ma le $40,000 tala le faatupega o le masini fā’ata faapitoa na foai mo le maota gasegase i Motootua.
O le taimi nei e na o le 5 masini faapitoa (ultrasound machine) o loo iai e 4 o loo i Motootua ma le tasi o loo i Tuasivi i Savaii.
