O le a tatala pea ofisa lagolago i tulaga o faalavelave tutupu i le faaitu lea o Hunter Valley i Niu Sa Uelese mo le isi vaiaso atoa ae ua faalauiloa mai e le faigamalo a Niu Sa Uelese o le a foaiina ane le 100 afe tala Ausetalia e faatupe ai fesoasoani mo aiga o i latou ua maliliu i le pasi na lavea i le faaiuga o le vaiaso na maliliu ai le toa 10 i le po o le Aso Sa.
O le premier o Niu Sa Uelese, Chris Minns sa ia folafolaina lea tulaga i le taeao analeila ina ua ia asia le nofoaga na tupu ai le faalavelave.
O le faaputugatupe o le a pulea faatasi e le faigamalo a le setete ma le Rotary Australia ma o le a tuuina ai fesoasoani i aiga o i latou ua maliliu ae faapea foi isi na aafia ae o loo soifua mai pea.
Fai mai le premier na te iloa o loo fia maua e nisi tagata ni auala e fesoasoani ai i aiga o ē ua maliliu ma e unaia i latou ia e mafai ona o latou foai ane i ofisa ua faatulaga e tuuina iai a latou fesoasoani ma luga foi o upega tafailagi.
O le toafitu ua maliliu e mai le faaitu o Singleton, o le toatele o le pasese a le pasi o nisi o le auvalaaulia i se faaipoipoga sa faia i lea faaitu.
Fai mai o le po anapo na ausia ai le fuainumera sa taumafai e ausia mo le faaputugatupe sa amataina e 100 afe.
