I le silia i le miliona tālā na maua i le sailiga tupe a le faalapotopotoga o le Toomaga mo ē Puapuagatia talu ai nei, ua faaopoopo atu i le foai a se alii faipisinisi Saina ua nofomau i Samoa le susuga Tu’itu’ioaiga Teeking Weng i lea sailiga seleni, meataalo e pei o taupega mo fanau sauaina o loo i le vaaiga a le Toomaga i le nofoaga o le Campus of Hope i Tuanaimato.
O lea foai o le a aogā i fanau mai le 2 i le 5 tausaga le matutua o loo faamautu i le nofoaga.
O le alii faipisinisi e ana lea foai o loo ia faagaioia le fale’aiga o le DMC ma faleoloa o le Coin Save.
Ua faaalia e le peresetene o le Toomaga le faletua o Siliniu Lina Chang, o se foai tāua tele mo fanau, auā o le isi lea vaega tāua o le latou olaga laiti o le iai o ni mea taalo e fiafia ai, ma fesoasoani i mafatiaga mai sauaga sa aafia ai.
