O le fitu aso ua mavae amata mai i le aso 8 o Me seia pā’ia le aso 15 e tasi le afe ma le ono tagata o le atunuu na maua i le siama o le faama’i Koviti-19. O le lipoti lea mai le soifua maloloina na faalauaitele mai i le afiafi o le Aso Lulu o le vaiaso nei lea ua faailoa ai o le toatele o tagata o loo alala ma nonofo i le motu o Upolu ua aafia i le siama e 10,318, o le motu o Savaii ua tasi le afe 639 ae o le motu o Manono e to’a sefuluono.
E lē o aumaia i le lipoti pe to’afia nisi i le motu o Apolima ua aafia, ae pe o loo saogalemu pea aiga o alala ai i lea motu o le atunuu. Ua siitia le aofaiga o tagata ua maua i le faama’i mai pasese malaga mai i Samoa i le 78, ina ua taunuu le malaga mai Fiti i le Aso Toonai na te’a nei e to’alua le pasese na maua ia la su’ega ua aafia.
O le malaga faapitoa lea mai Fiti e 124 le pasese, ae o le malaga faapitoa mai Niu Sila i le Aso Sa na te’a nei e 266 ma sa faia a latou su’ega e pei ona faailoa i le lipoti ae o loo faatali le taunuuga e iloa ai pe iai nisi ua maua i le siama pe o loo saogalemu uma. Ua oo atu ai nei le aofaiga atoa o i latou i Samoa ua maua i le Koviti-19 i le 11,973. E to’alima gasegase o loo taofia i le falemai i Motootua ona o āuga o le Koviti-19 ae leai ni gasegase i potu tigaina poo le Intensive Care Unit le ICU.
O loo tumau pea le numera o ē ua maliliu i le faama’i i le 24 talu mai le Aso Toonai o le vaiaso na te’a nei, ae ua faailoa i faamaumauga o le fitu aso ua mavae mai le Aso Gafua e tau mai i le Aso Sa na te’a nei o soifua ua fano i le faama’i e to’atasi na mae’a tui e lua ma le tui faaopoopo le booster, to’alima o le au maliliu ua mae’a tui e lua, to’alua e tasi le tui na faia, ae o le to’a sefuluono o le au maliliu e lei faia ni tui puipui o le faama’i.
O faamaumauga foi nei o loo faapea mai e to’aiva tagata maliliu e leai ni gasegase tumau na lipotia, to’atasi e tasi le gasegase tumau, ae o le isi 14 e silia i le tasi le gasegase tumau. E lē o faailoaina poo a ia gasegase tumau.
