E manatu nisi o tama taaalo Indigenous sa iai muamua i le taaloga lakapi liki le NRL e le o iai se tulaga o ni ituaiga tagata eseese i le taaloga aemaise lava i tulaga o ni taitai.

O lona uiga i se tasi faaupuga e pei ona latou faailoa, e le o iai ni faiaogaulu Indigenous head coaches i le taamilosaga a le NRL i le taimi nei i le itupa o alii. 

Ua faailoa e le Newshub e 17 ‘au o loo tausinio i le taamilosaga ma e silia i le 500 tagata taaalo o loo aofia ai ma o nisi faamaumauga mai le lipoti lea o loo ta’ua ai pe ā ma le 65 pasene o tama taaalo Indigenous poo i latou sa muai nofoia eleele, 45 pasene o lea numera o tagata Pasefika.

Fai mai o latou o loo tauaveina le taaloga ae o loo feagai pea ma ni faiga faailogalanu.

O le isi tama taalo sa iai muamua i le taaloga o Billy Moore lea o loo ta’ua sana faamatalaga i lea lipoti e faapea o ia e mitamita i lona tupuaga.

Fai mai foi se tasi o manager, Dean Widders ua tatau lava ona taofi faamatalaga faailogalanu ma ua tatau ona iai nisi gaioiga e faia i ituaiga faamatalaga ia e alia’e pea i taaloga aemaise o nai tagata talenia i taaloga.

Ta’ua i le lipoti e ui i le toatele o Indigenous players ae le o iai ni faiaogaulu ae toaitiiti foi nai tagata faigaluega Indigenous i le NRL.

Fai mai Widders o loo iai pa puipui ia e tatau ona tuu i lalo ma faaavanoa ai se ala mo tagata Indigenous e oo atu ai i isi tofiga taitai i le taaloga aua o loo tele le agavaa o loo iai.