O loo faia le finauga i le taimi nei mo le aiātatau e talimalo ai i se tasi o tausinioga tāua i le lakapi a le lalolagi.
I le 2025 o le a afea ai e le British and Irish Lions, Ausetalia e fetaui ai ma le Wallabies i ni taaloga faavaomalo poo tests e tolu.
O le sailiga la poo fea tonu le aai o le a talimalo i le faamoemoe, o le finauga lea o loo faagasolo i le taimi nei e ui i nisi faamatalaga ua iai maliega ua faia e Sini ma Melepone i le mataupu.
O lona uiga la e totoe ai le avanoa e tasi e foliga o le a finauina e Adelaide ma Perth.
I se faatalanoaga a se tasi iloga a Ausetalia i le taaloga sa taalo foi mo le Wallbies, Tim Horan na ia ta’ua ai e foliga e ono misi e Brisbane le avanoa lea e ui o taimi uma lava e malaga mai ai le ‘au lea a Peretania ma Aialani i Ausetalia e le misi lava se taaloga e faia i Brisbane.
Afai la ae malo Perth poo Adelaide i le test mulimuli ma misi ai Brisbane o lona uiga o le taimi muamua lea i totonu o le 75 tausaga o le a tulai mai ai lea tulaga o le lē talimalo o Brisbane i se taaloga a le Liona a Peretania ma Aialani.
