Ua avea nei se tasi o ofisa sili lagolago o le Matagaluega o le soifua maloloina a Samoa, ma Peresitene o le Komiti Faatonu o le Pacific Health Network, ina ua ave iai le ioega ma le faamaoniga a le Ofisa Sili poo le Faatonu Sili Aoao o le matagaluega o le soifua maloloina le susuga Aiono Dr Alec Ekeroma.
O le filifilia o le tamaitai ofisa sili lagolago le susuga Lenara Tupa’i Fui o le a galulue ai ma sui o le Komiti Faatonu mai atunuu o le Pasefika i auaunaga tau fesootaiga ma faamatalaga faatekonolosi mo le siitia o auaunaga faalesoifua maloloina.
O le faavaeina o lea komiti faatonu i le tausaga e 2006 na afua mai i le faaleleia o le fetufaaai ai o faamatalaga tau le soifua maloloina e fesoasoani ai i lea auaunaga tāua i le va o atunuu taitasi.
O se auaunaga o loo matua lagolagoina e le faalapotopotoga o le soifua maloloina o le lalolagi faapea le faalapotopotoga o le SPC poo le Pacific Community.
