Ua mautu nei fausaga o le sailiga o se faauluuluga fou e pulea le Matagaluega o Tina ma Tamaitai Atinae o Afioaga ma Aga Fesootai, ina ua faamaonia e le kapeneta le avea o se tasi o alo tamaitai o le atunuu susuga Loau Donina Tili Vaa e tauaveina le tulaga Ofisa Sili o pulega o lea matagaluega a le Malo.
O lea alo tamaitai o le atunuu sa galue i Ausetalia ma Niu Sila ma o loo ia umia ni tomai aoaoina ma ni faailoga e talafeagai lelei ma le auaunaga a lea matagaluega.
E toalina sa talosaga i le avanoa ma filifilia ai Loau Donina Tili Vaa, ma ua suitulaga o ia i se tasi foi tamaitai o le atunuu sa tauaveina lea tulaga o Dr Mema Motusaga ua faamavae.
I se tasi o filifiliga ua faamautu i se faaiuga a le Kapeneta, o le toe filifilia o le Ofisa Sili o pulega o le Matagaluega o puna’oa faalenatura ma le siosiomaga le afioga Lealaisalanoa Frances Debra Brown Reupena mo le isi 3 tausaga o lana konekarate.
Ua faalua ai nei ona filifilia lea alo tamaitai o le atunuu e faauluulu iai le pulega o lea matagaluega a le Malo.
