E toafā loia sinia i le ofisa o le Loia Sili a le Malo e aofia ai tamaitai e toatolu ma se tamalii e toatasi ua filifilia e tauaveina tulaga o loia sili lagolago i le faanaunautaiga o le tamaitai Loia Sili le susuga Su’a Hellene Wallwork ia siitia i se tulaga maualuga ma lelei le faatinoga o auaunaga a lea vaega tāua o galuega tau Tulafono a le Malo.

O i latou ua filifilia o le afioga Leilua Sosefina Faamausili o le loia sili lagolago mo le vaega o Tulafono Faavaomalo, o le afioga Leota Leitu Moananu Morin o le loia sili lagolago mo le vaega e Tusia Tulafono poo le Drafting Division.

O le alii loia le afioga Letoafaiga Lalau David J Fong o le loia sili lagolago o le vaega o le Civil Litigation and Opinion Division, ma le afioga Lupematasila Iliganoa Atoa o le loia sili lagolago mo le vaega o Mataupu tau Soligatulafono poo le Criminal Prosecution Division.

Faaalia e le tamaitai Loia Sili talu ona amata galue i le tulaga le tumau i le tofiga Loia Sili ia Setema o le tausaga e 2021, o loia ua filifilia nei e avea ma loia sili lagolago i vaega eseese o le auaunaga o le ofisa o le Loia Sili a le Malo, sa ia molimauina le maualuga o le faatinoga o o latou tiute, e le gata i o latou tomai i Tulafono a o le faatinoina o o latou tiute tauave i le tausisia o amio tausili.

O le susuga Su’a Hellene Wallwork ua mae’a ona aloaia lona filifilia e tauaveina le tofiga Loia Sili a le Malo, i le tuanai o le tausaga ma masina e fā o ia tauaveina le tofiga i se tulaga faavaitaimi.