Ua nofoia nei le nofoa o le Komesina o le Matagaluega o Leoleo Falepuipui ma le Ola Toe Fuata’ina, ina ua faamautu ma faamaonia e le Kapeneta i lana fonotaga i le Aso Tofi ananafi, le filifilia o le susuga Auapa’au Logoitino Filipo e avea ma komesina fou, i le tuana’i o le 10 masina talu ona faamavae le afioga Fuiavailili Egon Keil, sa tauaveina le tofiga mo le ono tausaga.
O le susuga Auapa’au Logoitino Filipo o se tasi o sui komesina o le matagaluega ae sa galue foi i le vaega o le vaaleoleo o le Nafanua sa avea ai ma kapeteni o le vaaleoleo mo se vaitaimi, a o avea le susuga Papalii Lorenese Neru ma Komesina o leoleo.
E to’afitu i latou sa talosaga i le avanoa e aofia ai ni leoleo e to’alima o loo umia tulaga faaleoleo o le Superintendent ma le to’alua na talosaga mai fafo atu o le matagaluega. Faaalia e se molimau e to’alua i laua na talosaga sa tuuina atu suafa i le Kapeneta mo le faai’uga mulimuli ma tofia ai le susuga Auapa’au Logoitino Filipo.
