Ua filifilia nei Faalogo Tana Umaga e avea ma faiaoga a le ‘au a le Moana Pasefika mo le 3 tausaga o lana konekarate.
E pei ona ta’ua e Faalogo i se faatalanoaga i luga o auala faatekonolosi ma le vasega o tusitala i nisi o vaega o lona tofiga fou i le ‘au Moana Pasifika.
“O loo iai lava vaega e ao ina toe faaleleia i le ‘au ma o loo fuafua e toe tagai i taaloga ua mae’a atu sa taaalo ai le ‘au i vaega e ao ina toe atia’e ai ma ia mautu le iai o tagata lelei e fesoasoani auā le agai i luma o le Moana Pasifika.”
Sa faiaoga muamua lenei alo iloga o le atunuu i le ‘au a le Moana Pasefika a o tapena ai i lana taaloga ma le ‘au a le All Blacks i le 2020 na ta’ua ai e Faalogo o se avanoa lelei lea mo ia e toe foi ai e fesoasoani i alo ma fanau a le Pasefika.
“O se faamanuiaga mo a’u lenei tofiga, e leai lava se eseesega ma le tautua a nai o tatou tuaa.
“A silasila iai o le tautua a nai o tatou mātua e auau lava ina ia fesoasoani i aiga i mea lelei uma, ma e faapena se lagona o i ia te au.
“E pei ona ou iai i le taimi nei i se tasi foi o tofiga i le ‘au tele a Samoa i tapenaga mo le faamoemoe o loma nei ou te talitonu o se taimi lelei lea e tautua ai auā le atunuu e le gata i Samoa ae o le tofiga fou ua faaee ia te au mo le ‘au a le Moana Pasifika.”
Sa avea Faalogo ma se tasi o sui a le ‘au a le All Blacks i tausaga e tele aemaise ai lona sao i le Super Rugby a o taalo ai i le ‘au a le Hurricanes.
Na amata lona tofiga faiaoga i le ‘au a le Toulon i Farani ona toe foi lea i Niu Sila ma faiaoga ai i nisi o kalapu lakapi a Niu Sila.
O loo i Samoa nei Faalogo i lona tofiga o se faiaoga lagolago i le ‘au a le Manu Samoa.
