Ua toso le taofilima i le amatalia o galuega o le falema’i tumaoti fou o le a fausia i Salelologa i Savai’i, ae sei fetu’unai muamua tulaga i le au faisea o le pulea o lea auaunaga tau soifua mālōlōina ona faato’a amata ai lea o le galuega.

Ua faailoa lea tapenaga e le ali’i pule o le Pasefika Specialist Health Samoa, le afioga Tagaloafaaofonuu Parvish Kumar i se pepa o faamatalaga mai le Ofisa Sooupu o le Malo, ina ua faailoa ai i se lipoti a le vaega faasalalau o le PMN suafa o nisi i Samoa e aofia ai se tamaitai e iai ona so’otaga faaleaiga i le Minisita o le Soifua Mālōlōina, ma le Pule o le Pulega o Malae Vaalele, e faapea e iai o latou sea poo shares i lea falemai tuma’oti.

Advertisement

I le pepa o faamatalaga mai le Ofisa Sooupu o le Malo o loo faailoa ai e le ali’i pule o lea falema’i tuma’oti e leai se fuafuaga e taofi ma faamuta le fausia o le falema’i, ae o le faailoa lautele o le taofiga lē tumau o le amataina o le galuega ona sei toe fetuutuuna’i le tulaga i le lotoifale o le au faisea ina ia manino ma leai se faaluafesasi o le puleaina o le auaunaga pe a amata ona faagaioi seia oo ina mae’a ma amata loa le tautua.

O le vaiaso ua mavae na suaina ai le eleele e faailoga ai le amataina o le galuega lea ua lisi atu ai e le malo le 10 eka o ona eleele i le taulaga i Salelologa e faatū ma faagaioia ai lea falema’i. O le umi o le lisi e luasefulu tausaga.

O le Pasefika Specialist Health Samoa o se kamupani e iai foi ona falema’i tuma’oti e tolu i le atunuu o Fiti lea sa asiasi iai le Minisita o le Soifua Mālōlōina i le masina o Mati o le tausaga nei i le faamoemoe e fia molimauina lea auaunaga ao lei faia se faaiuga a le malo e pei ona taliaina le fa’afoe o lea falema’i i lo tatou atunuu.

Ua faailoa e Tagaloafaaofonuu Parvish Kumar e tāua ia te ia le faia loa o se gaioiga i le lotoifale o le pulega o le falemai, ma faataoto lelei i le agotonu tulaga i ni aiā feteena’i poo conflict of interest, i le fuafuaga ia ‘aua nei to’alia le faatautaiga o galuega o loo autū i le tautuaina o le soifua mālōlōina o tagata aemaise i le va nonofo ai ma le malo.