O le Aso Faraile nei, i Brive i Falani o le a faia ai le taaloga a le Manu Samoa ma le ‘au a le Barbarians.
Ina ua mae’a le uluai taaloga a le Manu Samoa ma Iapani i le masina talu ai, na faamaonia ai loa se isi taaloga a le Manu o le a fai ina ia faasauni pe faavevela atu ai mo ana taaloga i le taamilosaga a le Ipu a le Lalolagi i le masina fou, e pei o na lipotia e le Loop Pacific.
O le ‘au lea a le Barbarians, e faiaoga ai le faiaoga ulu a le Bristol Bears, o se tasi foi o alo o Samoa, le susuga Pat Lam, sa avea foi ma tama taalo mo le Manu Samoa.
O loo iai foi i le ‘au lea nisi sa iai i le tatou ‘au e pei o Tim Nanai Williams, Akī Seiuli, Jeffery Toomaga Allen ma Mark Lam.
Pe a uma le taaloga lea ma Barbarians, na ta’ua e le susuga i le alii faiaoga, Vaovasamanaia Seilala Mapusua, o le a agai atu le ‘au i Bayonne, e taaalo ai ma le ‘au a Aialani ma faaiu ai loa a latou taaloga faavevela e tapena ai mo a latou taaloga mo le Ipu a le Lalolagi.
