Ua aloa’ia tiute ma lafoga faaopoopo e totogi e Kanata, Mexico ma Saina aga’i ia Amerika, ma ua toe amata ai nei le isi fefinaua’iga tau fefaataua’iga i le va o atunuu nei.

O Kanata, Mexico ma Saina o le to’atolu aupito i maualuga lea i le faatulagana o atunuu o loo fefaataua’i ma Amerika peitai o lea ua aloa’ia i le vaiaso nei tiute ma lafoga faaopoopo i luga o oloa o loo faatau atu ia Amerika.

O lea lava na faailoa e le Peresetene o Amerika, Donald Trump ina ua aloa’ia lana nofoaiga ia Ianuari, o le tulaga lea e oo iai, ma i le aotelega o suiga nei o le iuni a Europa lea e foliga mai o le a tigaina ai.

E 25% lafoga e totogi e Mexico ma Kanata i luga o oloa o loo ia faatau atu ia Amerika, ae o Saina o lea ua faaluaina tiute o ana oloa ma o lea ua saofa’i i le 20%.

Mai nei siitaga fou o le a maua ai e Amerika le lata i le $2.2 trillion tupe Amerika.

E lē o nofonofo ai foi paaga nei e tolu a Amerika, o lea ua tali atu Saina ma faaaopoopo le isi 10 i le 15% i luga o nisi o oloa o loo sau mai Amerika ma e amata aloa’ia i le aso 10 o le masina nei lava.

E ese mai i lea o le a faia foi tapu mo nisi o pisinisi Amerika o loo iai i totonu o fefaataua’iga nei i le va o atunuu e lua.

Ae mai ia Kanata ma Mexico lea ua 30 tausaga o fefaatauai saoloto e aunoa ma ni lafoga totogi agai ia Amerika, e 25% o le a totogi e pisinisi Amerika mo oloa tusa ma le $20.7 piliona tupe Amerika le tau ma a uma aso e 21 o loo faatumau pea lafoga fou a Trump, o le a faalautele atu i le isi $86.2 piliona tau o oloa a Amerika.

O loo faatali se tali a Mexico poo le ā sana ia faai’uga.

Puna o Faamatalaga: Trade wars erupt as Trump hits Canada, Mexico, China with steep tariffs | RNZ News